Ka Jingkylla jong ka sain hima sima hapoh ka Jylla, ka la pynkulmar jingmut thlim ia ki paitbah ba bun balang ba iano kin phah sha ka ing dorbar thawain ka jylla. Ka por ka la dei ban bishar bha kiba kumno ki nongialam ba ngin jied na ka bynta ka lawei ka Ri bad ka jaitbynriew, ha kum kane ka samoi ba bun eh ki party kiba ieng pynksan la ka jong ka jong ki mat treikam na ka bynta ka jylla bad ka ri hi baroh kawei.
Na ka liang jong nga shimet nga kwah ban kyntu ia ki paitbah nongshongshnong jong ka Jylla ha ka ba ia dei bad ka jingjied nongmihkhmat ha ka ne ka election MLA ka ban long ha ka 27 tarik Rymphang 2018,
U wei pa kawei na ki nongshongshnong jong ka Jylla kiba la don 18 snem shaneng, ki dei ka dawbah jong kane ka elction MLA ban ai ia ka rai ba dei biang na ka bynta ka lawei jong ka Jaitbynriew, lada bakla ban jied nongmihkhmat sha ka ing Dorbar thawain ka Jylla, ka dei ka jingkitkhlieh kaba khraw kum ki nong shong shnong na ka bynta ka roi ka par, lada ngim bishar bha hashwa ba ngin nion ia ka kti kdew na ka bynta ka rai jong ka lawei ka jaitbynriew rit pait jong ngi.
Kum u nongshong shnong jong ka Jylla kam long kaba suk ban shu sngap jar jar ne peitkai ia ka saw ka sian khlem da kyntu lang ia ki para Ri, ba ngim dei ban shah pynbiej ne shah pynthame ha ki bor jong ka pisa na ka bynta ka shi vote jong ngi. Ngim lah ban len ba ka pisa ka trei borbah ha ka por election na ka bynta ban pynjop iano re iano kiba rhah bor tang ban ioh shong kali light saw, hynrei to da kynmaw ba ka pisa kam lah ban thaw ain ne shna ain na ka bynta ka jaitbynriew jong ngi, lada u nongmihkhmat uba ngi jied um don ka jingstad bad jingshemphang ban ia said bad ban iada ia ngi na ka jinglong kyrpang, kan long tang ka jingbabe hadien.
Ban jied nongmih khmat ka dei ka hok la jong ka jong ngi ki nongshong shnong, ngi dei ban long shlur ban jied ia uno uno u ba ngi i mon ba don ka nongrim pyrkhat pyrdain kiba biang, kiba iar bad iohi jngai na ka bynta ka lawei jong ka Ri bad ka jaitbynriew.
Kaba kongsan tam hangne ka dei ka rai ka jong phi ka dei ka rai jong ka jaitbynriew, namar ki nong mih khmat baroh kiba ngin jied, ki dei ban long ki briew kiba don ka jingkit khlieh ban aiti lut ia la ka kam kum ki nongthawain kiba lah ban wanrah ki song jingkyrkhu na ka bynta ki shnong ki thaw ha ka imlang sahlang bad ka Jylla hi salonsar pynkut u kyrwoh na u bah Majaw.